The Weekend Logo
WOW & FLUTTER Presents
The Weekend 本地薑週末 2019

走杯 GO CUP

走杯 GO CUP

文:yipkit

身為香港人,你實會日日睇新聞,咁你有無睇過以下呢啲:

「受高氣壓帶影響,格陵蘭上周氣溫比正常高 22.2°C...... 創下自 1979 年有天氣衛星監察以來,六月中最低冰量記錄。」(2019.06.17)

「一條懷孕的抹香鯨屍體上周被衝上意大利海岸,它肚子裏有22公斤(48.5磅)塑膠垃圾...... 驗屍結果亦發現,抹香鯨懷着嚴重腐爛的死胎,它吃下的大量塑膠物品,佔據了三分之二個胃,令它無法消化烏賊。」(2019.04.03)

「有海洋生物學家日前在菲律賓南部海岸,發現一條擱淺死亡的年幼柯氏喙鯨魚(Cuvier's Beaked Whale)屍體,經解剖後發現,「死因」竟然是因為胃內塞滿重達 40 公斤的膠袋......」(2019.03.19)

其實講嚟講去,都係想講一個大家已知嘅事實:唔單止我哋身處嘅香港病咗,而係連地球嘅五大洲同七大洋都病埋。海洋裡面各種生物同動物已經做咗「義士」,身先事卒為人類所做嘅後果付出代價。

好多人貪一時方便,唔拎隻隨行杯出門口,唔攞個環保袋出街,唔袋啲可重用嘅餐具餐盒同手巾仔放喺袋,有時天口熱順手再買多杯奶蓋茶,紙杯紙巾膠樽膠袋飲筒叉羹筷子,全部即棄,喺你覺得乾手淨腳嘅時候,你知唔知你出街幾粒鐘已經製造咗幾多件垃圾?!

垃圾啫,都有得回收㗎嘛!係喎,細路仔都識啦...「藍廢紙、黃鋁罐、啡膠樽」,回收咗咪無問題囉。你咪以為啦!好似紙杯咁,唔好以為紙做就回收到,其實隻杯裡面有一層防水膠膜,所以星巴你同太平咖啡嘅外賣紙杯都係回收唔到㗎!就算膠樽,都有分編號,每號膠都有唔同處理手法同步驟。雖然話膠樽都有得回收,但你諗下,如果香港每日有一半嘅人都買一支膠樽飲品,咁一個月就會有1億5百萬個膠樽,香港嘅回收廠都應付唔到呢個咁恐怖嘅數量!

或者你又會問:係唔係冇亂拋垃圾落海,海洋嘅塑膠災難就唔關我事呢?

當然水上活動或海邊玩完隨處丟遺留落嚟嘅當然有。事實上,呢啲咁輕嘅塑膠即棄用品有更多係喺街道、經水渠、河流甚至喺堆填區被風雨吹咗落海,日積月累,直到每次打風,海洋就一次過雙倍奉還畀人類。所以自備杯、自備餐具同水樽,減少使用即棄塑膠用品,為嘅唔單單係環境,仲有海洋同我哋嘅下一代。唔製造垃圾先係way out!

今年wow and flutter本地薑大露營繼續有 走杯 Go Cup,如果你唔記得帶杯唔緊要,俾少少按金就租隻俾你,唔好再用膠,用完歸還就可以攞返按金,乾手淨腳又唔會影響環境!

無論去玩定去抗爭,香港人都係好關心環境好關心有無留低垃圾,之前兩次本地薑週末,大家都做到完show之時場內無咩垃圾留低,希望我哋大家今年一齊keep住呢個傳統!

******************************
走杯 GoCup 約定你28-29.9元朗大棠本地薑大露營見
 
www.theweekend.hk
#wowandflutterhk
#theweekendhk

所有文章